Ұландық жауынгері - ел чемпионатының қола жүлдегері

Ақтау қаласында өтіп жатқан спорттық және жауынгерлік самбодан жастар арасындағы Қазақстан Республикасының чемпионаты өз мәресіне жақындап келеді. Еліміздің түкпір-түкпірінен жиналған жас спортшылар боз кілемде бақ сынап, өз шеберліктерін паш етуде. Бәсекесі жоғары додада әр белдесу – табандылық пен төзімнің, жігер мен намыстың сыналар сәті.

         Осы байрақты бәсекеде 53 келі салмақ дәрежесінде Қазақстан Республикасы Ұлттық ұланының 3502 әскери бөлімінің әскери қызметшісі, қатардағы Сағыныш Қуанышұлы жүлделі үшінші орынға ие болып, мерейін үстем етті. Жас болса да, жігері мығым сарбаз қарсыластарынан қаймықпай, әр белдесуде ерік-жігерін таныта білді.

         Сағыныштың айтуынша, бұл жетістік – тынымсыз еңбектің нәтижесі.

         – «Бұл жарыс мен үшін үлкен тәжірибе болды. Әр қарсыласым мықты, әр белдесу оңай өткен жоқ. Соған қарамастан, бар күшімді салып, жүлдегерлер қатарына ілінгеніме қуаныштымын. Алда әлі де дайындалып, бұдан да жоғары нәтижеге жетуді мақсат етемін», – дейді жас спортшы.

         Шынында да, әскери қызмет пен спортты қатар алып жүру – үлкен жауапкершілікті талап етеді. Сағыныш сынды сарбаздар үшін мұндай жарыстар тек жеңіс емес, сонымен қатар шыңдалу алаңы. Олар сапта да, спортта да үздік болуға ұмтылады.

         Айта кетейік, Ақтаудағы чемпионат әлі де жалғасуда. Ертең, яғни 3 сәуір күні жарыс өз мәресіне жетіп, жеңімпаздар мен жүлдегерлер толық анықталады. Ал бүгінгі жетістік – ертеңгі биік белестерге бастар нық қадам.

ҚР Ұлттық ұланы «Батыс» өңірлік қолбасшылығының баспасөз қызметі