Ардагер жолшы жас мамандармен жүздесті

«Көлік жолы - қай мемлекетте де экономиканың күре тамыры» болып табылады. Бұл салада ұзақ жылдар абыройлы еңбек еткен аға буынның кейінгі ұрпаққа айтары көп.

Осыны ескерген ұлттық жол сапа орталығы еліміздің әр өңірінде тұратын ардагер жолшылармен арнайы жүздесіп, олар жиған тәжірибені күнделікті жұмыста қолдануға бет бұрды.

Ақтаулық ардагер, «Құрметті жолшы» төсбелгісін таққан Есіркеп Оразәлиев орталық филилына келіп, ұжыммен кездесті. Мамандар жарақтанған озық үлгідегі құрал-жабдықтар, жылжымалы зертхана жұмысымен танысты. Бұдан соң дөңгелек үстел өтіп, жас қызметкерлердің көкейтесті сауалдарына жауап берді.

«Жол саласында 1977 жылдан бастап еңбек еттім. Қатардағы қызметкерден бастап учаске бастығына дейін жоғарыладым. Қызмет жылдары ондаған шәкірт тәрбиеледім. Қазір олар еліміздің әр аймағында облыстық, республикалық автокөлік жолдары құрылысында жүр. Әлі күнге білмеген жерін сұрап, хабарласып тұрады. Бүгін арнайы шақырумен жол сапа орталығы келдім. Техникалық қамтылуы жағынан мәселе жоқ. Тек тиімді қолданып білсе болғаны. Біздің кезімізде жұмыстың денін қол күшімен атқаратынбыз. Тәуелсіздік алған жылдары бұл салаға көп көңіл бөлінді. Жастарымыз қызығушылығы жоғары екені қуантады» - деді ардагер жолшы.

Есіркеп Оразәлиевтің сөзінше, басқа аймақтармен салыстырғанда Маңғыстау өңірі көлік жолдарының сапасы жағынан көш ілгері. Жол құрылысына қолданылатын материалдар да өз жерімізде өндіріледі. Мәселен, Қаратау бойынан алынатын қиыршық тасты жергілікті компаниялар қолданса, Ақтаудағы битум зауыты ішкі нарықты отандық шикізатпен қамтып отыр.

«Жол құрылысы саласында 40 жылдан астам еңбек еткен ардагермен бүгін танымдық кездесу өтті. Алған әсеріміз зор. Есіркеп ағамыздың жол салу кезінде шаң көтерілмеуі үшін суға аз мөлшерде қара майды қосу арқылы шашу тиімді екенін айтқаны бізді қайран қалдырды. Осы тәсілді күнделікті жұмыста қолдануға шештік» - деді жас маман Оразалы Ақылбеков.

Филиал басшылығы енді осы үрдістен жаңылмай, әр сайын ең кемі бір ардагер жолшымен танымдық кездесу өткізуді күн тәртібіне қойған. Бұл, өз кезегінде өзге де кәсіпорындарға үлгі болары сөзсіз.

«ЖАҰСО» баспасөз қызметі.