Маңғыстаулық самбошылар бас жүлдені иеленді

Жуырда Орал қаласында 1997-1998 жылғы туылған жастар арасында тек Батыс Қазақстан емес,бар қазақ елінің мақтан тұтар ұлы Самбо күресінен Әлем Чемпионы Асқар Шайхиевты еске түсіруге арналған Халықаралық турнир болып өтті. Аталмыш дүбірлі додаға Ресей, Армения, Белорусь, Әзірбайжан, Өзбекстан, Қырғыстан, Тәжікстан мемлекеттерімен қаар еліміздің әраймағынан келген 500-ге жуық спортшы қатысты.

Халықаралық жарыстан Маңғыстау облысының құрамасы алғаш рет самбо бойынша Бас жүлдені иеленіп, облыс қоржынына 3 алтын медальді салды. Самбодан аймақтың бас бапкері Манарбек Бисекеновтың шәкірттері Аманбек Құлқаев, Нұрболат Сенғалиұлы, Сұңғат Жұбатхан алтыннан алқа тағып, өлкенің намысын абыроймен қорғады.

Самбодан облыстың бас бапкері Манарбек Бисекенов: «Әрбір бапкер үшін шәкірттерінің үмітті ақтап, биік белесті бағындырғаны.-үлкен мәртебе. Мұндай самбо тарихында тұңғыш рет командалық есепте Бас жүлдені иеленіп отырмыз. Бұл біз үшін үлкен жетістік. Шамам келгенше, жастарды спортқа тартып, облыстың намысын республикалық, Халықаралық жарыстарда қорғауға еңбектеніп жүрмін.

Самбомен айналысуға бел буған жастарды «Жастар спорт» кешенінде жаңадан ашылған секцияға шақырамын. Ал жарысқа қатысуға қолдау көрсеткен облыстық самбо күресінің Федерациясына алғысымды білдіремін»,-дейді Самбодан облыстың бас бапкері Манарбек Бисекенов.

Халықаралық деңгейдегі Біріншілікті ұйымдастыру барысында бапкерлер жас самбошылардың тәжірибесін молайтып, шеберліктерін шыңдауды мақсат тұтыпты.

Жарыстың қорытындысы бойынша жалпы командалық есепте жерлестеріміз Бас жүлдені иеленсе, І, ІІ және ІІІ орындарды Оңтүстік Қазақстан, Батыс Қазақстан және Қарағанды облыстарының самбошылары өзара бөлісті.

Жеңімпаздар бағалы сыйлықтармен қатар, «Спорт шебері» атағын иеленді.