Маңғыстауда сайлаушылар үшін барлық қолайлы жағдай жасалды

Бұл туралы Маңғыстау облыстық сайлау комиссиясының мүшелері мәлімдеді. Олардың айтуынша, «Облыста 223 учаскелік комиссия жұмыс істеп жатыр. Ал Ақтауда 74 сайлау учаскесі таңғы сағат 7-00 ден бастап өз есіктерін сайлаушылар үшін айқара ашты.

25-мамырдан бастап әрбір сайлаушы өзіне жақын сайлау учаскесіне барып, тізімге енген немесе енбегені туралы ақпарат алу мүмкіндігі берілген болатын.

Егерде 9-маусым күні әртүрлі себептермен тұрғылықты жерінде болмайтын азаматтар есептен шығару куәлігін алуы керектігі туралы ақпарат таратылды. Сол куәлікпен жүрген жерінде тіркеліп, дауыс бере алады.

-Вахталық әдіспен қызмет атқаратын мұнайшылардың сайлауға қатысуы үшін тізімдер жасақталып, кенорындарында 5 сайлау учаскелері ашылған. Сондай-ақ, мүмкіндігі шектеулі жандар үшін барлық сайлау учаскелерінде арнайы жағдай жасалған. Бұл биылғы сайлаудың ерекшелігі болып табылады. Есту қабілеті төмен адамдарға құлаққаптар, кабиналарда көзі көрмейтін топтағылар үшін трафареттер орнатылған, лупа-әйнектер қойылған.

Мүмкіндігі шектеулі адамдар үшін сайлау учаскелерінде арнайы пандустардың жабдықталғанын көруге болады.

Әртүрлі ерекшеліктерге арнайы жасақталған учаскелерде 8000 ға жуық сайлаушы дауыс бере алады, - дейді Маңғыстау облыстық сайлау комиссиясының мүшелері.

Видеоны түсірген Нүркен ТӘЖІБАЙ, суреттер Нұрғаным Имашеваныкі