Ақтау қаласының №2 сотында фронт-офис ашылды

Іс-шараға Маңғыстау облыстық сотының төрағасы Ержан Даулиев, Ақтау қаласының №2 сотының төрағасы Рахымжан Бейсенов және судьялар, медиаторлар, адвокаттар, БАҚ өкілдері қатысты.

Сонымен, өңірдің тағы бір соты халыққа қызмет көрсетудің заманауи стандарттары ескерілген «OpenSpace» азаматтарға тосқауылсыз қызмет көрсету қағидаттарына толығымен көшті.

-Осы бағдарламаны іске асыру аясында Ақтау қаласының № 2 сотының төрағасы Рахымжан Бейсенов пен кеңсе меңгеруші Нұрқожа Ерджанов Сарыарқа аудандық сотына тәжірибе алмасу үшін іс-сапарға барған болатын.

Фронт-офис жайлы жиһазбен, ұйымдастыру техникасымен, сот отырыстарының тізімі мен талап және басқа да арыздардың үлгілері жазылған стендтермен жабдықталып, интернетке қолжетімділік қамтамасыз етілген. Ақпарат орталығы, өзіне-өзі қызмет көрсету орны, күту залы, медиатор мен адвокат кабинеттері де осында жайғастырылған.

Фронт-офисте азаматтар медиаторлар мен адвокаттардан консультациялар алып, медиация тәртібімен дауларды шешуге мүмкіндік алады,- деп хабарлайды осы ақжолтай жаңалықпен бөліскен Маңғыстау облыстық сотының баспасөз қызметі.

Суреттерді түсірген Маңғыстау облыстық сотының баспасөз қызметі