Жас балуандар шеберлік сабағында дәріс алды

Облыстық «Жас батыр» мамандандырылған балалар мен жасөспірімдер спорт мектебінде жас дзюдошыларға арналған кезекті шеберлік сабағы өтті. Оған аймағымыздың шалғай ауылдарынан келген барлығы 100 бала қатысып, білікті бапкерлерден тәлім алып, шеберліктерін шыңдады.

Шеберлік сабағын ұйымдастырудың мақсаты туралы ойымен бөліскен облыстық «Жас батыр» мамандандырылған балалар мен жасөспірімдер спорт мектебінің директоры Манарбек Бисекенов:

         -Бүгін спорт мектебімізде өтіп жатқан шеберлік сабақтарын ұлттық құрама мен жастар құрамасының мүшелері, білікті бапкерлер өткізуде.

Жақында шалғай ауылдарда самбо, дзюдо секцияларының ашылуынан кейін ауылдағы жас балуандарға еліміздің намысын халықаралық жарыстарда қорғап жүрген спортшыларымыз Әмірбек Жеңісов, Сұңғат Жұбатхан,  Бауыржан Нарбаев, Бауыржан Сағынғалиұлы, Рамазан Мамаевтар шеберлік сабақтарын өткізген болатын.

Ауылдағы балалардың басын бір жерге қосып кәсіби спортшылармен кездестірудегі басты мақсат - жас спортшыларды ынталандыру, біліктіліктерін арттырып, білімдерін толықтыру,-деп мәлімдеді.

         Шеберлік сабағында жас балуандарға бірнеше әдіс-тәсілдер көрсетіліп, олардың қойған сұрақтарына білікті бапкерлер тарапынан тұщымды жауап та берілді.