Коммуналдық қызмет мәселесін үйден шықпай-ақ шешуге болады

1 Апреля 2017 (20:31) | 1367 | Автор: Мира Ботабекова

Ақтаулықтар коммуналдық қызмет мәселесін үйден шықпай-ақ шешуге мүмкіндік алды. Ақтау қаласы әкімдігі жасақтаған мобильді қосымша сәуірдің бірінде іске қосылды. Ғаламтор қолданушысы шағымын жазып, хабарлаған дерегіне дәйек ретінде фотосурет жалғайды. Құзырлы орган арызды онлайн түрде қарап, шешім шығарады. Сайтқа кірген азамат өтінішінің қалай қаралып жатқанын да бақылай алады. Айта кетерлігі, тұрғын үй шаруашылығы сапасын жақсартуға бағытталған мұндай мобильдік қосымша әзірге Ақтауда ғана. Мамандар инновациялық тың тәсілді EXPO-2017 көрмесіне апарып, көрермен назарына ұсынуды жоспарлап отыр.

Руслан Жүкенов, қалалық тұрғын үй инспекциясы бөлімінің жетекшісі:

- Сайтқа түсетін арыз-шағымдар жедел қаралады. Бұдан соң үй күтіміне жауапты ұйымның өз ісіне жауаптылығы артып, қызмет сапасының жақсарары сөзсіз. Мобильді қосымшадан азаматтар қала аумағындағы тұрғын үй кооперативтері мен коммуналдық мекемелер туралы мәліметтерді де ала алады.