Урологтар айрықша операция жасады

Маңғыстау өңірінің тарихында алғаш рет ағзаның зәр шығару жолына лапароскопиялық операция жасалды. Бұл туралы «Хабар24» арнасы хабарлады.

Бұған дейін бүйректегі тасты алу үшін денеге ұзындығы 20 сантиметрлік тілік жасалатын. Ол науқастың тез сауығуына кедергі келтіретін. Ал лапароскопия әдісі бойынша науқас келесі күні-ақ аяғына тік тұрып, бірер аптада құлан таза айығып кетеді.

Облыстық ауруханадағы урология бөлімшесі жыл басынан бері 10 адамға емдік шаралар көрсетіпті. Жалпы жаңа технология көмегімен денеге тілік түсіретін операциялар саны 15%-ға азайған.

Мұхамеджан Нұрғазиев, облыстық аурухана директорының орынбасары:

- Осы жылы лапароскопиялық әдіспен жасалатын операциялар санын көбейтуді жоспарлап отырмыз. Тек қана несеп жолдарына байланысты емес, хирургиялық оталардың да санын көбейткіміз келіп отыр және операциялардың барлығы да Маңғыстау тұрғындарына тегін көрсетіледі.

 Жолдыбай Қабышев, науқас: - Қандай ем қолдансам да, бүйректе жиылған тас өздігімен шыға қоймады. Он жылдай зардабын тартқан сырқатымнан біржола айықтырған дәрігерлерге ризамын.