Мемлекеттің қауіпсіздігі мен Тәуелсіздік тірегі – қуатты әскер

ҚР Президенті Қасым-Жомарт Тоқаевтың 2026 жылғы 28 қазандағы «Жаңа тарихи кезеңдегі Қазақстанның өзекті міндеттері» атты Қазақстан халқына Жолдауына 3502 әскери бөлімінің командирі, подполковник Андасов Есенғазы Анатолевичтің үн қосуы:

Мемлекеттің қауіпсіздігі мен Тәуелсіздік тірегі – қуатты әскер

Мемлекет басшысы, Қазақстан Республикасы Қарулы Күштерінің Жоғарғы Бас Қолбасшысы Қасым-Жомарт Кемелұлы Тоқаевтың бүгінгі тарихи Жолдауы еліміздің даму жолындағы жаңа кезеңнің басымдықтарын айқындап берді. Егемендігіміздің 35 жылдық белесі қарсаңында жарияланған бұл стратегиялық құжат әрбір отаншыл азаматқа, әсіресе, ел қауіпсіздігін күзеткен әскери қызметшілерге үлкен жауапкершілік жүктейді.

Президент өз Жолдауында мемлекеттілік пен заң мен тәртіптің маңыздылығына ерекше тоқталды. Тұрақтылық пен бейбітшілік жоқ жерде ешқандай реформа мен экономикалық өрлеудің болуы мүмкін емес. Сондықтан ел ішіндегі тыныштықты сақтау және сыртқы қатерлерге қарсы тұру — біздің, яғни әскери қызметшілердің қасиетті борышы.

Қазіргі геосаяси жағдайда әскердің кәсібилігін арттыру, заманауи технологиялар мен басқару жүйелерін енгізу және жеке құрамның жауынгерлік рухын нығайту міндеті тұр. ҚР Ұлттық ұланының 3502 әскери бөлімінің жеке құрамы Жолдауда айтылған мақсаттарды толық қолдайды. Біз Мемлекет басшысы белгілеген заң мен тәртіп қағидатын бұлжытпай орындауға, құқықтық тәртіпті қамтамасыз етуге және Отанымыздың қауіпсіздігін қорғауға әрқашан дайынбыз.

Президенттің «Жаңа тарихи кезеңдегі Қазақстанның өзекті міндеттері» атты үндеуі бізді жаңа жетістіктерге жұмылдырып, Отанға деген қызметімізді сапалы әрі адал атқаруға серпін береді. 3502 әскери бөлімі Жоғарғы Бас Қолбасшының сенімін ақтап, еліміздің тыныштығын кірпік қақпай күзетуді жалғастыра береді!