Балаларға стационарлық көмек көрсетуге дағдыланды

Маңғыстау облыстық балалар ауруханасы қабылдау бөлімі Дүниежүзілік денсаулық сақтау ұйымының «Балалар шағындағы ауруларды ықпалдастыра жүргізу» бағдарламасы аясында семинар ұйымдастырды. «Балаларға стационарлық көмек көрсету» тақырыбында өткізілген шараға қабылдау бөлімінің мейірбикелері мен кіші медицина қызметкерлері қатысып, шеберліктерін шыңдап, білімдерін толықтырды.

-Мұндай семинар біздің бөлімде әр ай сайын ұйымдастырылады. 5 жасқа дейінгі балаларға қалай жедел көмек көрсетілуі тиіс, бізден көмек сұрап келген балаларға қалай дұрыс іріктеу жасауымыз керек деген мәселелерді қамтимыз.

Негізінде бізге келетін балаларға үш этап бойынша көмек көрсетеміз яғни, шұғыл белгілері бойынша, жолдамамен келетіндер бойынша және жарақат алғандарға этап бойынша көмек көрсетіледі.

Бүгінгі семинарда барлығына түсінікті болу үшін біріміз - мейірбике қызметін атқарып, енді біріміз - ата-ананың рөлін сомдап, тағы біріміз - кіші медицина қызметкері (санитарка) болып, муляжды бала деп алып, соған көмек көрсеттік.

Тәжірибемізбен бөлісіп, еркін пікір алмастық. Жалпы қабылдау бөлімінің құрамына педиатрлық кабинеті мен жарақаттану пункті кіреді. Күніне біздің бөлім 100-ден астам балаға көмек көрсетеді,-дейді қабылдау бөлімінің меңгерушісі Нұргүл Арықова.

Сурет автордыкі