Бейнеуде су тазарту стансасы іске қосылды

Бейнеу ауданының орталығында су тазарту стансасы іске қосылды. Кешен «Ақбұлақ» бағдарламасы аясында салынды. Жоба құны – 2,2 млрд теңге. Тәулігіне 12 мың текше метр су тазартады. 45 мың текше метр су сақтауға қауқарлы.  Бүгінге дейін Бейнеу ауылындағы 11 мыңнан аса үйге тіршілік көзі тасып әкелінетін. Енді тұрғын үйлердің 82 пайызы орталықтандырылған су жүйесіне қосылды.  Жоба бірнеше кезеңге бөлінген. Кешенді салуға 150 жергілікті тұрғын тартылған. Арнайы оқылған 25 адам нысандағы техника күтіміне жауапты.

Сейфолла Өсербаев, инженер:

 -Ауданымызда су тазалайтын қондырғы ашылғалы оқуын оқып, бір ай курстан өттім. Қазір тұрақты жұмыспен қамтылып, инженер болып жұмыс жасап жатырмын. Құрамымда тоғыз оператор, бес машинист жұмыс жасайды. Күндіз-түні төрт ауысыммен жұмыс жасаймыз.