Компания мәліметінше, 11 сәуірден бастап Астанада арнайы комиссия жұмысын бастады, оның құрамына энергетика министрлігі, еңбек және халықты әлеуметтік қорғау министрлігі, "Самұрық-Қазына" ҰӘҚ АҚ, "ҚазМұнайГаз" ҰК АҚ өкілдері, сондай-ақ 10 адамнан құралған БерӘлі компаниясының белсенді тобы кірді.

Бүгінге дейін жұмыс комиссиясы үш отырыс өткізді.

"ҚазМұнайГаз" мәліметінше, сатып алу қызметін ұзақ мерзімге белгілеу мәселесі бойынша компания өкілдері "3+2" схемасы бойынша келісімшарт жасасуға дайын екенін білдірді. Ол бойынша келісімшарттар қосымша 2 жылға ұзарту құқығымен 3 жылға жасалатын болады.

"Жекелеген мәселелер бойынша БерӘлінің бұрынғы қызметкерлерінің талаптары өзгерді: атап айтқанда, жерасты жөндеу жұмыстарының қосымша көлемін "Бұрғылау" және "МұнайФилдСервис" жеке компанияларына беріп, БерӘлінің бұрынғы қызметкерлерін осы компанияларға жұмысқа орналастыру мүмкіндігі айтылды. Алайда, алдын ала келіссөздерден кейін аталған компаниялардың басшылығы өз бригадаларының толық жүктелмеуіне байланысты мұндай қызмет түрін көрсетуге қызығушылығы жоқтығын мәлімдеді", - делінген ҚМГ хабарламасында.

Мемлекеттік орган өкілдері еңбекті қорғау және ұйымдастыру жағдайлары, бірыңғай тарифтік-біліктілік анықтамасын қолдану, тендер рәсімдеріне қатысты мәселелер бойынша тәуелсіз комиссия құруды қарастыруға дайын екендіктерін мәлімдеді.

Бұдан бөлек, ҚМГ өкілдері БерӘлі компаниясының бұрынғы қызметкерлерінің барлығын осыған дейінгі жалақысы мен әлеуметтік пакетін сақтай отырып, конкурс нәтижесінде жеңімпаз болған компанияға жұмысқа орналастыруға дайын екендігін растады.

Қазіргі уақытта жоғарыда аталған мәселелерді талқылау жалғасып жатыр және тараптар қолданыстағы заңнамаға сай келісімге қол жеткізуге мүдделі.