Боранқұл ауылындағы мектепте жылыжай жұмыс істеп тұр

Бейнеу ауданындағы Боранқұл орта мектебінде 6 түрлі көкөніс өсетін жылыжай бар. Мектеп оқушылары өсімдіктерді баптап, бос уақытында көкөністердің күтімімен айналысады. Бұл туралы Боранқұл мектебінің директоры Ұлмекен Бисенғалиева мәлім етті.

Оның айтуынша, жылыжай оқушылардың биологиялық таным көкжиегін кеңейтіп қана қоймай еңбексүйгіштікке тәрбиелейтін орта.

Мектеп ауласындағы жылыжайдың ауданы 24 шаршы метр. Ұзындығы-8, ені-3 метр.

«Елімізде көкөністердің сырттан келетінін ескерсек, мектебімізде жылыжай ісінің жолға қойылғандығы қуантады. Мұнда қияр, қызанақ, көк бұрыш, аскөк және салат жапырағы сияқты өнімдер өсіріледі. Жылыжайда оқушылармен тәжірибелік жұмыстар үнемі жүргізіліп отырады. Атап айтар болсақ, биологтар әр түрлі тақырыпта зерттеу жұүргізсе, жаратылыстану бағытындағы мұғалімдер экологиялық акциялар өткізеді»,-деді Ұлмекен Бисенғалиева.

Сондай-ақ мұнда психолог, дефектолог мамандары ерекше білім беруді қажет ететін оқушылармен терапиялық жаттығулар жасайды. Мамандар мұндай жаттығулар оқушылардың танымдық көкжиегін кеңейтіп, жан-жақты дамуына оң әсер етеді деген сенімде.

Бейнеу ауданы әкімдігінің баспасөз қызметі