2017 жылдан бастап кәсіптік-техникалық білім тегін беріледі

2017 жылы «Баршаға тегін кәсіптік-техникалық білім» жобасы енгізіледі. Білім және ғылым вице-министрі Бибігүл Асылованың айтуынша, аталған бағыт бойынша техникалық және кәсіптік білімі бар мамандарды даярлау және қысқа мерзімді кәсіптік оқыту шаралары қарастырылған. Осының нәтижесінде 2017-2021 жылдар аралығында кәсіптік даярлау және оқытумен барлығы 671,5 мың адам қамтылады.

«Бірінші қолдау шарасы техникалық, ауылшаруашылық, технологиялық мамандықтар бойынша және сервис және қызмет көрсету саласындағы мамандықтар бойынша жұмысшы кадрларын даярлауды көздейді. 2017 жылдан 2021 жыл арасында даярлаумен 471,5 мың адам қамтылады. Оның ішінде республикалық бюджет қаражаттары есебінен жыл сайын 106,5 мың адам, ЖБ есебінен 365 мың адам бар», – деді вице-министр.

Сонымен бірге оның айтуынша, жаңа бағдарлама бойынша 9-11 сынып түлектері, аз қамтылған отбасылардан шыққан біліктілігі жоқ жастар білім алатын болады. Осы бағдарлама шеңберінде үміткерлердің тізімін қалыптастыруға және іздестіруге ықпал ететін жергілікті білім беру және жұмыспен қамту органдарын, полиция қызметтерін тарта отырып, әрбір елді мекенде әкімдіктер жанындағы мобильді топтар құрылатын болады. Қатысушылар әңгімелесу қорытындысы бойынша оқуға алынады. Олар тамақпен және шәкіртақымен қамтамасыз етіледі.