Маңғыстаулық жас химиктер халықаралық олимпиадада жүлдегер атанды

Маңғыстаулық жас химиктер 1-6 мамыр аралығында Астанада өткен химия пәнінен оқушылар арасындағы 57-ші халықаралық Менделеев олимпиадасында жүлдегер атанды, деп хабарлайды Қоғамдық коммуникация орталығы.

Ел намысын Қазақстан құрама командасының 15 мүшесі қорғады. Қазақстан құрама командасының сапына енген облыстың 4 жас химигі сайыста бақ сынады.
 
Халықаралық додада «Білім-инновация» лицей-интернатының оқушылары Мұғалім Әліби, Молдағұл Әділжан, Жақсылық Шәкір қола медаль және Габдолла Райымбек грамотамен марапатталды.

Жүлдегерлер республикалық пәндік олимпиадалардың, халықаралық «Туймаада», жасөспірімер арасындағы (IJSO)  халықаралық олимпиадаларының бірнеше дүркін жеңімпаздары.
 
Айта кетсек, халықаралық олимпиадаға әлемнің 21 елінен 116 қатысушылар қатысты. Олардың қатарында Қазақстан, Ресей, Австрия, Сауд Арабиясы, Армения, Израиль, Өзбекстан, Түркменстан, Сирия, Хорватия, Болгария, Венгрия, Македония, БАӘ, Әзірбайжан, Бразилия елінің командасы бар.