Ақтаулық ұстаз «Ыбырай Алтынсарин» төсбелгісімен марапатталды

Ақтау қаласындағы химия-биология бағытындағы Назарбаев Зияткерлік мектебінің білікті ұстазы, биология пәні мұғалімі Гүлжан Нүсіпжанова «Ыбырай Алтынсарин» төсбелгісімен марапатталды, деп хабарлайды Қоғамдық коммуникация орталығы.

Гүлжан Нүсіпжанова - Астана қаласында өткен Тәуелсіз Мемлекеттер Достастығы қатысушы мемлекеттерінің мұғалімдері мен білім беру саласы қызметкерлерінің VII съезінің пленарлы отырысында, Оқу-ағарту министрі Асхат Аймағамбетовтің қолынан, жас ұрпақты оқыту және тәрбиелеу ісіндегі елеулі табыстары үшін «Ыбырай Алтынсарин» төсбелгісімен марапатталды.

Осы салада 30 жылға жуық еңбек өтілі бар Гүлжан Нүсіпжанова, оқу ордасының мақтанышы. Осы уақытқа дейін 10-ға халықаралық, республикалық олимпиадалар жеңімпаздарын дайындап шығарған білікті маман. Білім саласына қосқан үлесі мен оқушыларды оқыту мен тәрбиелеудегі кәсіби қызметі үшін «Білім және ғылым министрінің құрмет грамотасымен» марапатталған.

Сондай-ақ, В.Я. Курбатов атындағы ХІІ Халықаралық ғылыми жобалардың олимпиада-конкурсында олимпиада жеңімпаздарын дайындағаны үшін Санкт-Петербург мемлекеттік технологиялық институты атынан алғыс хатқа да ие болған.

-Бүгінгі төсбелгінің мен үшін орны ерекше. Өйткені қазақтың ұлы педагогі, ең алғаш қыздарға арнап мектеп ашқан көрнекті тұлғаның есімі берілген «Ыбырай Алтынсарин» төсбелгісін алу кез-келген ұстаз үшін үлкен мәртебе, дейді Гүлжан Нүсіпжанова.