Ақтауда «Ержан Хазірет» атындағы мешіт халық игілігіне пайдалануға берілді

Бүгін Ақтау қаласының 39 шағынауданында «Ержан Хазірет» атындағы жаңа мешіттің құрылысы аяқталып, халық игілігіне пайдалануға берілді, деп хабарлайды Қоғамдық коммуникация орталығы.

​Салтанатты шараға қала тұрғындарымен қатар, Маңғыстау облысының әкімі Н. Ноғаев, Қазақстан мұсылмандары діни басқармасының төрағасы, Бас мүфти Наурызбай қажы Тағанұлы арнайы қатысты.

 ​Шара барысында ҚМДБ төрағасы, Бас мүфти мешіттің салынуына үлес қосқандарға рахметін айта отырып, бір қатар азаматтарды алғыс хатымен марапаттады.

 ​- Қазақ халқында «Азаны бар ел азбас деген», мешітте азан айтылса ол елдің азбайтындығын нақыл сөздермен жеткізіп кеткен. Бүгін міне Киелі Маңғыстау жұртында жақсы іс-шара өтіп жатыр. Біз осыдан бірнеше жыл бұрын осы мешіттің ірге тасын қалап, сол кезде ақсақалдар мен жамағаттың қатысуымен бірге дұға етіп халыққа қызмет ететін қасиетті орын болуын нәсіп ет деген болатынбыз. Алла дұғамызды қабыл етіп бүгін сол мешіттің ашылуында жиналып отырмыз,- деді Наурызбай қажы Тағанұлы.

 ​Зәулім мешіттің құрылысы, күмбезі заман талабына сай тұрғызылған. Имандылық үйінде бір мезетте 500 адам намаз оқи алады.