Атамекен ауылдық округіндегі тұрғын үй массивіне жеке су желісі тартылды

Атамекен ауылдық округіне тиесілі «Арай» тұрғын үй массивіне 3,5 шақырым жеке су желісі тартылды. Бұл туралы Мұнайлы ауданы әкімінің орынбасары Нұрбек Қарасаев мәлім етті.

«Бұл тұрғындардың мәселесін шешу үшін ұйымдастырылған игі жұмыс. Көктем мезгілінен бері Мұнайлыда ауыз су тапшылығы болғаны белгілі. Бірақ барлық жерге су кесте бойынша беріліп отырды. Алайда «Арай» тұрғын үй массиві Атамекен ауылының соңғы нүктесі болғандықтан су бармай қалатын. Осы мәселені шешу үшін тұрғын үй массивіне арнайы су желісі тартылды. Жаңа желі тартылғаннан кейін тұрғын үй массивінің 80  пайызына су барды. Тұрғындарда су түгел жетуі үшін қосымша  2 су сорғы құрал орнаттық», - деді Нұрбек Қарасаев.

Оның айтуынша, бұл іске «Маңғыстау Жылу» мемлекеттік коммуналдық кәсіпорнының 15 маманы мен 5 арнайы техникасы жұмылдырылған.

Мұнайлы ауданы әкімдігінің баспасөз қызметі