Маңғыстаулық балалар Парижде Гран Приге ие болды

17 Октября 2018 (10:04) | 2390 | Автор: Нурганым Имашева

Франция елінің астанасы Париж қаласында өткен халықаралық фестивальде Ақтаудан барған балалар Бас жүлде алды.

«Crystal STAR festival» - осымен 14-ші рет өткізілді. Балалар шығармашылығын дәріптейтін фестивальға түрлі номинацияда 60-қа жуық бала қатысты.

Әр елден келген оқушылар өзара танысып, табысып, өз елі туралы мәлімет берді. Қазақстаннан қатысқан Асылбек Меңдібаев Ақтау қаласындағы №11 мектептің 9 сынып оқушысы. Ал, Гүлнұр Әжімағин № 14 мектептің 8 сынып оқушысы. Екеуі де балалар шығармашылығымен айналысатын «Даму Медиа» мектебінің оқушылары.

Актерлік шеберлік номинациясы бойынша сайысқа қатысып, өз жас ерекшелігі бойынша Гран При ұтып алды.

Бас жүлдеге қол жеткізу үшін «Даму Медиа» мектебінің оқушылары ұстаздарымен тынымсыз дайындалды. Сахнада 5 тілде сөйлеп, өнер көрсетті.

Оқушылар сахнаға шыққанда танымал әнші Дима Құдайбергеннің француз тілінде орындалған әні пайдаланылды.

Ақтаулық оқушыларға Париж қаласында 1770 жылы салынған Дезажет Театрының сахнасында өнер көрсету бақыты бұйырды. Бұл театрдың сахнасында болудың өзі бір ғанибет.

Еліміздің намысын қорғаған оқушылардың жетекшісі Гүлнұр Жадринаның айтуы бойынша "Бұл Дамулықтар үшін жыл басынан бері қатысып отырған үшінші халықаралық фестиваль. Египет елінен 3 Гран При, Түркиядан 1-ші орын және Парижден Гран При алып отырмыз.

Медиа мектеп 1 қараша күні өзінің алғашқы туған күнің атап өтпек. Н.Жантөрин атындағы музыкалық драма театрында сағат 18.30-да дарынды балақайларымыз өнер көрсетеді.

Дамулықтарды құттықтау үшін Алматы қаласынан танымал әнші Айдана Меденова келеді деп жоспарлап отырмыз. Барша өнер сүйер қауымды асыға күтеміз".

Парижді өз өнерімен тәнті етіп, Қазақ елінің абыройын асқақтатқан өрендерді, жетекшілері Гүлнұр Жадринаны және жас дарындардың ата-аналарын үлкен өнер додасындағы Бас жүлделерімен құттықтаймыз.

Өнер бәйгесінде де, өмірде де әрдайым алда болыңыз, жетістіктеріңізбен дүйім елді қуантып, абыройларыңыз арта берсін! Қазақтың өнерін әлемге танытуда қанаттарыңыз талмасын!!!

Суреттерді түсірген «Даму Медиа» мектебі