Маңғыстауда жеті айда АИТВмен 32 адам тіркелген

АИТВ инфекциясымен тіркелетін жерлестеріміздің қатары күннен күнге көбеймесе, азаймай келе жатқаны анық. Мұны ЖИТС-тің алдын алу және оған қарсы күрес жөніндегі Маңғыстау облыстық орталығынан алған мәліметтерден көріп отырмыз.

Биылғы 6 айда өңірімізде 27 адам АИТВ-мен тіркелген болса, 7 айда бұл көрсеткіш 32 жеткен. Дегенмен, орталық мамандары АИТВ/ЖИТС бойынша эпидемиологиялық ахуал тұрақты екендігін айтып отыр.

1994 жылдан бері Маңғыстау облысында АИТВ жұқтырғандардың жалпы саны -299 болды. Оларды аудан-қалаларға бөліп қарастырсақ, Ақтау қаласында 168, Мұнайлы ауданында - 19, Жаңаөзен қаласында - 7, Бейнеу ауданында - 2, Түпқараған ауданында - 6 және Қарақия ауданында - 4 адам тіркелген. Бұлардың арасында 12 адам - өзге облыстардың тұрғындары, ал 81-і -шетелдіктер.

-Соңғы 7 айда тіркелген 32 адамның 25-і немесе 78,1 пайызы Қазақстан Республикасының азаматтары болса, 7-і шет елдер азаматтары екен. АИТВ-мен тіркелгендерді жынысына қарай бөліп қарағанда олардың 25-і немесе 81,5% ер азаматтар екендігі, 7-і (21,9%) әйелдер екендігі анықталған.

Өкінішке орай, АИТВ жұқтырғандардың 28,1% 20-29 жастағы жастарға тиесілі болып тұр, яғни, 9 жас қыз-жігіттер тіркелген. Ал 12 адам 30-39 жастағылар, 8 адам 40-49 жастағылар. 50-59 жас аралығындағы 3 адам тіркелген.

Әлеуметтік жағынан қарастырғанда, осы мерзім ішінде тіркелгендердің 19-ы экономикалық белсенді азаматтар, 12-і белгілі бір жерде жұмыс істемейтіні белгілі болды. 1 адам тергеу-қамауға алынғандар арасынан шыққан. Бұл көрсеткіштер АИТВ вирусын жұқтырудан ешкім сақтандырылмағанын, аурудың адам таңдамайтынын аңғартса керек, - деп хабарлайды ЖИТС-тің алдын алу және оған қарсы күрес жөніндегі Маңғыстау облыстық орталығының баспасөз қызметі.

Суреттер Sputnik Казахстан, Tumba.kz сайттарынан алынды