Маңғыстаулық балуандар Жезқазғаннан 5 медальмен оралды

Жезқазған қаласында 4-8 сәуір аралығында жауынгерлік самбо күресінен ерлер мен әйелдер арасында Қазақстан Республикасының чемпионаты өтті. Дүбірлі додаға еліміздің әр өңірінен 600 спортшы қатысты.

Ел Біріншілігінде Маңғыстау облысының самбошылары жақсы ойын көрсетіп, бірнеше жүлделі орындарды жеңіп алды.

52 кг салмак дәрежесінде Домбаев Нұркен 1 орынға ие болып, алтыннан алқа тақты.

48 кг салмақта Аппазова Балнұр 2-орынға лайық деп танылып, күміс медальдің иесі атанса, 62 кг салмақтағы Мамаев Рамазан және 68кг салмақтағы Серғазиев Нұрлыбай - 3 орынды қанағат тұтып, қола жүлдені иеленді.

Сонымен қатар 100кг салмақта сынға түскен Мұратұлы Айболат та ІІІ орынға табан тіреді.

Алтын медальдің иесі атанған Нұркен Домбаев алғашқыда Шығыс Қазақстан облысының балуаны Егінбаев Думанмен күш сынасса, екінші кездесуін Қызылорда қаласынан келген спортшы Қаражігітов Русланмен өткізіп, қарсыласының жаурынын жерге тигізген соң, үшінші белдесуін Ақтөбенің балуаны Кәрібаев Әнуармен өткізіп, оны да таза жеңіспен тізе бүктірген.

 Финалда Ақтөбе қаласының спортшысы Сапаров Эдуардтан басым түсіп, алтыннан алқа тағып, жеңіс тұғырына көтерілді.

Маңғыстаудың намысын қорғап, аймақ абыройын асқақтатқан балуандарымызды жеңістерімен құттықтап, келешекте де биік шыңдарды бағындыруды нәсіп етсін деген тілегімізді арнаймыз.

Суреттерді түсірген облыстық «Жас Батыр» мамандандырылған спорт мектебінің баспасөз қызметі