Маңғыстауда «Нұрлы жер» бағдарламасы аясында 6 жобаны жүзеге асыру үшін 2,8 млрд.теңге бөлінген

«Нұр Отан» партиясының Маңғыстау облыстық филиалында өткен кезекті қоғамдық тыңдауда «Нұрлы жер» бағдарламасының аймақта іске асырылу барысы талқыланды.

Сондай-ақ, жиында тұрғын-үй коммуналдық шаруашылығы инфрақұрылымын жаңғырту мәселелері де қаралды.

Шарада «Нұр Отан» партиясы МОФ төрағасының бірінші орынбасары Н.Тумышев, облыстық құрылыс басқарма басшысы А. Хамиев, облыстық энергетика және тұрғын-үй коммуналдық шаруашылығы басқармасының басшысының орынбасары Н.Орынбасаров баяндама жасады.

Мәжіліске облыстық мәслихаттың депутаттары, қала, аудан құрылыс бөлім басшылары, мердігерлер, партиялық бақылау комиссиясы мен жемқорлыққа қарсы іс-қимыл жөнідегі қоғамдық кеңес мүшелері, «Нұрлы жер» комиссиясының мүшелері қатысты.

Облыстық энергетика және тұрғын-үй коммуналдық шаруашылығы басқармасы басшысының орынбасары Нұрлан Орынбасаров тұрғын-үй коммуналдық шаруашылығы инфрақұрылымын жаңғырту жұмыстары туралы баяндады. Оның айтуынша, «Нұрлы жер» бағдарламасы аясында 2017 жылы 6 жобаны жүзеге асыру үшін 2,8 млрд.теңге бөлінген.

-Атамекен селосының тұрғын массивтерін сумен жабдықтау желілерінің құрылысына 976,311 млн.теңге қарастырылды.

Су құбырының ұзындығы - 161,095 шаршы метр. Одан бөлек, Маңғыстау ауданының Жыңғылды селолық округіндегі елді-мекендерді ауыз сумен жабдықтау құрылысы, Жыңғылды селосына есептегіш құралдарын орнатуға 361,863 млн.теңге бөлінді, су құбырының ұзындығы - 33,514 шаршы метр.

Мұнайлы ауданының Батыр селолық округінде инженерлік-коммуникациялық инфрақұрылым салуға жайғастыру құрылысының жобасының жалпы құны – 869,594 млн.теңгені құрады.

Баянды-3 тұрғын үй массивін сумен жабдықтау желілерін салуға 132,737 млн.теңге, С. Шапағатов селосының 5 орамындағы жаңа тұрғын үйлерге газбен жабдықтау желілерін салуға 1194,775 млн.теңге қарастырылған болатын.

 Аталған жобаларды ағымдағы жылдың соңына дейін аяқтау жоспарлануда. Нәтижесінде Атамекен, Батыр, Баянды-3 және Жыңғылды елді мекендері толықтай орталықтандырылған су жүйесімен қамтамасыз  етіледі.

Сонымен қатар, С.Шапағатов (5 орам) елді мекені толықтай газбен қамтамасыз етіледі,-деді Нұрлан Орынбасаров.

Суретті түсірген: «Нұр Отан» партиясының баспасөз қызметі