″Каспий″ су тұщыту зауыты үш ауданды сумен қамтиды

              Ақтаудағы «Каспий» су тұщыту зауыты «Нұрлы жол» бағдарламасы бойынша жаңғыртылып, салтанатты түрде іске қосылды. Енді кәсіпорын тәулігіне 30 мың текше метр теңіз суын тазартып, үш бірдей Мұнайлы, Түпқараған және Қарақия аудандарының халқын тіршілік нәрімен қамтамасыз етеді.

             Бұрын тәулігіне небәрі 10 мың текше метр су өндіретін зауыт қайта жаңғыртылған соң қуаты үш есеге артты. Бұл зауыт «Нұрлы жол» бағдарламасы бойынша жаңғыртылып, әлемдегі осы заманғы ең озық технологиямен жабдықталды. Тозығы жеткен қондырғылар бірнеше есе қуаттысына ауыстырылды. Күрделі жөндеу жұмыстарына жергілікті қазынадан 3 млд теңге жұмсалған. Осылайша, Ақтаудың іргесіндегі үш ауданда су тапшылығы мәселесі шешімін тапты. Жақын күндері бұл өңірдің тұрғындары су тасу машақатынан да біржола құтылмақ. «Каспий» зауытынан үш бірдей ауданға су құбыры тартылып, 200 мыңнан аса адам өз үйінен таза ауыз су ішеді.

ҚҰЛЖАН ЕГІЗҚАРАЕВ, МҰНАЙЛЫ АУДАНЫНЫҢ ТҰРҒЫНЫ:

- Біздің халқымыздың, еліміздің өркендеп өсіп жатқандығының тағы бір көрінісі дер едім. Бұл Тәуелсіздігіміздің жемісі, бұл Президентіміздің саясатының жемісі, бұл халықтың жеңісі! Аллаға шүкір, міне Мұнайлы ауданында 140 мыңдай халық тұрады. Бұйырса осы зауыттың суын соншама тұрғын тұтынатын болады.

            Зауытты жаңғырту жұмыстарының бірінші кезеңі аяқталды. Алдағы жылдары қалған ескі су қондырғылары да түгел жаңартылады. Осылайша зауыттың қуаты тәулігіне 40-50 мың текше метр теңіз суын сүзгіден өткізуге жетеді деп жоспарланып отыр.

Маңғыстауда жерасты су көздері тапшы. Сондықтан да жергілікті билік Құрық порты маңынан тағы бір теңіз суын тұщытатын зауыт салуды көздеп отыр. Қуаттылығы жоғары - тәулгіне 50 мың текше метр су тазартпақ. Мемлекеттік-жекеменшік әріптестік аясында жүзеге асатын жобаға қазір байқау жарияланды. Қаржы көзі анықталған соң құрылысы басталады.