Нұркен Домбаев Азия чемпионатының қола жүлдегері атанды

Ташкентте спорттық және жауынгерлік самбодан Азия чемпионаты аяқталды. Дүбірлі додада бағын сынаған маңғыстаулық балуан, облыстық «Жас Батыр» мамандандырылған балалар мен жасөспірімдер спорт мектебінің шәкірті 52 келі салмақта Нұркен Домбаев қола медальға қол жеткізіп, аймақ абыройын асырды.

Бұл туралы қуанышты жаңалықты балуанды жарысқа дайындаған белгілі бапкерлер Берік Жұмағалиев пен Ерлан Серіков хабарлады.

Азия біріншілігіне он мемлекеттен 300-ге жуық балуан қатысты. Төрт күнге созылған жарыстың нәтижесінде ел спортшылары 23 алтын, 15 күміс және 24 қола медальді олжалады.

- Азия чемпионаты 29 маусым мен 2 шілде аралығында Ташкентте өтті. Жарысқа Маңғыстаудан екі спортшыны апардық.

Нұркен Домбаев-үмітімізді ақтап, жүлдегер атанды. Өкінішке орай, балуанымыз Елнұр Қоянбай бесінші орыннан көрінді.

Енді 5-8 шілде аралығында Астана қаласында самбодан Елбасы жүлдесіне арналған Әлем кубогы өтеді. Оған балуандарымыз Нұркен Домбаев, Руслан Сариев, Айболат Мұратұлы қатысады деп күтілуде.

Спортшыларымыздың осындай үлкен жарыстарға қатысуына жағдай жасап, қолдау көрсеткен облыстық спорт басқармасына, облыстық самбо федерациясына және облыстық «Жас Батыр» мамандандырылған балалар мен жасөспірімдер спорт мектебінің басшылығына алғыс айтамыз,-дейді облыстың самбодан аға бапкері Ерлан Серіков.