Мемлекеттік қызметкерлер ант қабылдады

Маңғыстау обылысы Ақтау қаласы Абай атындағы мәдениет сарайында мемлекеттік қызметкерлер күніне орай жиырма үшінші маусымда мемлекеттік қызметкерлердің ант беру рәсімі өтті.

Ант қабылдау Қазақстан Республикасының «Мемлекеттік қызмет туралы» заңымен және Қазақстан Республикасының Президенті жарлығымен мемлекеттік қызметкердің ең басты міндеттерінің бірі болып бекітілген.

Аталмыш мерекелік шарада ант қабылдаудың үлкен жауапкершілігін сезініп, мемлекеттік қызметтің алғаш табалдырығын аттаған жас мамандар Отанға адал болып, кәсіби қызмет көрсететуге серт берді. Мемлекеттік әкімшілік қызметке жаңадан қабылданған қызметкерлер ретінде ант қабылдағандар арасында жас маман Әбдімұқанов Әлфараби Зейдінабдұллаұлы да болды. Ол - Қазақстан Республикасы Инвестициялар және даму Министрлігінің Индустриялық даму және өнеркәсіптік қауіпсіздік Комитетінің Маңғыстау облысы бойынша департаментінің Мұнай-химия, металлургия және тау-кен өнеркәсібін мемлекеттік қадағалау бөлімінің бас маманы.

Өз кезегінде мемлекеттік әкімшілік қызметкер ретінде ант берген жас маман алдағы уақытта мемлекеттің мүддесі үшін қызмет ететінін жеткізді.

 -Мемлекеттік қызметке орналасқаныма қуаныштымын. Өзімнің адал еңбегім арқылы елімнің өсіп-өркендеуі үшін бар күш-жігерімді, білімімді жұмсап, аянбай қызмет етуді, сөйтіп тәуелсіз мемлекетіміз – Қазақстанның дамуына өз үлесімді қосуды парызым санаймын – деді бас маман Әлфараби Зейдінабдұллаұлы.

Салтанатты рәсімде Маңғыстау облысы әкімінің орынбасары Шолпан Ильмуханбетова жас мемлекеттік қызметкерлерді құттықтап, олардың ел мен мемлекет алдындағы үлкен жауапкершілігі туралы, Елбасының бес институционалдық реформасын іске асыру барысында мемлекеттік қызметкердің адал еңбегі сәттілік кілті болатындығын айтып, елге адал қызмет етуге, кәсіби қызметіне күш-жігерін аямай жұмсауға, білімі мен тәжірибесін ұштастыруға шақырды.

Сонымен қатар ізгі тілектермен жас мамандарды бөлім бастықтары, ардагерлер, мемлекеттік қызметкерлер де қызу құттықтады.

Шара соңы бейнебаян көрсетілімі мен «Екі жұлдыз» концертіне ұласты.