Азғындық әрекет жасаған автобус жүргізушісі сотталды

Маңғыстау облысының кәмелетке толмағандардың істері жөніндегі мамандандырылған ауданаралық сотында Қазақстан Республикасы Қылмыстық кодексінің 124-бабының 1-бөлігімен (көрінеу жас балаға қатысты күш қолданбай азғындық әрекеттер жасау) айыпталған 69 жастағы автобус жүргізушісі Б-ға қатысты қылмыстық іс бойынша сот үкімі жарияланды.

Аталған қылмыстық іс жабық тәртіпте қаралды.

Сот үкімімен Б. жоғарыдағы баппен кінәлі деп танылып, оған 8 (сегіз) жылға балаларға қатысты белгілі бір лауазымдарды атқару немесе белгілі бір қызметпен айналысу құқығынан айыра отырып, 5 (бес) жылға бас бостандығынан айыру жазасы тағайындалды. Сонымен қатар, сот үкімінің азаматтық талап бөлігіне сәйкес, сотталушыдан бір ай мерзім ішінде жәбірленушінің пайдасына 500 000 (бес жүз мың) теңге моральдық зиян өндірілетін болады.

Естеріңізге сала кетейік, өткен жылдың желтоқсан айында сотталушы өзі жұмыс істейтін аудандық мектептің 4-ші сынып оқушысына қатысты түрлі сипатта азғындық әрекет жасаған.

Сот үкімі күшіне енген жоқ. Бұл туралы Маңғыстау облысының кәмелетке толмағандардың істері жөніндегі мамандандырылған ауданаралық сотының баспасөз қызметі хабарлады.