Өткен жылы Маңғыстауда есірткінің заңсыз айналымына қатысты 182 адам сотталған

Бұл туралы Маңғыстау облыстық сотында БАҚ өкілдеріне арналып, 2016 жылда сот төрелігін жүзеге асырудың қорытындысы бойынша өткізілген баспасөз мәжілісінде айтылды.

Маңғыстау облыстық сотының қылмыстық істер жөніндегі апелляциялық сот алқасының төрағасы Ержан Өсерханұлы Қарабаевтың мәлімдеуінше, «Облыс соттарында өткен жылы барлығы 2012 тұлғаға қатысты 1738 қылмыстық іс қаралған. Соның ішінде 1472 тұлғаға қатысты 1245 қылмыстық іс үкім шығарумен аяқталған, 418 адам жөніндегі 377 іс өндірістен қысқартылған, заңмен тыйым салынған әрекеттерді есі дұрыс емес халде жасаған 4 адамға медициналық сипаттағы мәжбүрлеу шаралары қолданылған.

 Сот талқылауын жан-жақты жүргізіп, дұрыс сараптама жасау нәтижесінде 21 тұлғаға қатысты ақтау үкімі шығарылды.

Қылмыстық істер жөніндегі апелляциялық сот алқасында барлығы 316 адамға қатысты 243 іс қаралған (2015 жылдың 12 айында барлығы 226 адам жөніндегі 168 іс қаралған)».

-Есірткі немесе психотроптық заттарды заңсыз дайындау, өңдеу, иемденіп алу, сақтау, тасымалдау, жөнелту немесе сатуға байланысты 2016 жылдың 12 айында қаралған қылмыстық істер бойынша – 182 адам сотталған. Оның ішінде бас бостандығынан айырылғандар - 71 адам, түзеу жұмыстарына – 1 адам жіберіліп, 60 адамға түрлі көлемде айыппұл салынған, 45 адам қоғамдық жұмысқа тартылып, 2 адам бас бостандығынан шектелген, 2 адам шартты жазаға тартылған, 8 адам қылмысты қайталап жасаған, - деді Ержан Өсерханұлы журналистер тарапынан қойылған сауалдарға жауап бере отырып.