Жас инспекторлар слеті өтті

Жасөспірімдер мен жастар арасындағы жол апаты жарақатының алдын алу мақсатында, Маңғыстау облысында Жол қозғалысы жас инспекторларының слеті өтті.

Жыл сайынғы ауқымды шара биыл Ақтаудағы Қазақ-түрік лицейінің базасында ұйымдастырылып, өңірдегі қос қала мен аудандардан 6 команда қатысты. Сайысқа қатысушылардың жалпы саны 60 оқушыны құрады.

 - Слет бағдарламасына сәйкес, жас ұландар 8 түрлі сыннан өтті. Олар, жол-қауіпсіздік ережелерін дәріптеп, сақтыққа шақыратын үгіт бригадасы жұмысын; әскери тактика бойынша саптық түзелуді; білгірлер арасында тест тапсырмаларын орындауды; алғашқы медициналық көмек көрсетіп, жас санитар қызметін; жас эрудит; жас реттеушілік шеберлігін велосипедті мәнерлеп айдауды көрсетсе, команда жетекшілері өз алдына бөлек сайысты, - дейді қазылар алқасының мүшесі Маңғыстау облыстық ІІД жергілікті полиция қызметінің аға инспекторы, полиция аға лейтенанты Гаухар Биялиева.

 Қазылар құрамын Маңғыстау облысының Ішкі істер департаменті мен Білім басқармасының мамандары толықтырып, қатысушыларға әділ баға берді. Сайысқа қатысушы командалар арасында, Ақтау, Жаңаөзен қалаларынан және Түпқараған ауданынан келген командалар ерекше көзге түсті.

Слет бір күнге созылды. Қазылар шешімімен жүлделі үшінші орынды Маңғыстау ауданының, екінші орынды Жаңаөзен қаласының командасы иеленсе, жеңіс Мұнайлы ауданынан келген жас инспекторлардың еншісінде.

Енді, жеңімпаз команда 17-26 тамыз аралығында Алматыда өтетін республикалық сайыста облыс намысын қорғайтын болады.